華欣曼谷泰梳乎 ~ Day 1

2016年3月3日 (四) (晴)

｛香港 > 曼谷 > 華欣 > Hua Hin Hilton Resort > Dinner @ Chao Lay > 華欣夜市｝

今日一早搭07:55機，所以5:30am就要搭的士去機場，點知出左門口等先發現冇攞電話，到上左的士又發現冇帶passport, 真係差d老貓燒鬚，好彩只係出左路口，即刻叫司機折返… 嚇屎

一不離二，上到機又話要delay一個鐘

HK Airline早餐正常

中式就麻麻

因為一落機就會包車去華欣，所以喺機場唱左少少錢先…機場對4，好貴呀！之後出去對4.5呢！

出左閘仲要去買電話卡，呢張true都ok

出到閘就見到我book果間租車公司, 埋去同佢對完資料, 佢就俾左個車牌No, 叫我地出去等

車到喇...司機話佢唔係接我喎....Oh...原來個staff睇錯下一行....又要再等過

兩個人包左架十人車, 坐得好舒服

司機手車都算定

車裏面仲好迷幻....哈哈...

做咩啫? 好似去左澳門賭場咁既?

搭左兩個幾三個鐘, 終於到達華欣Hilton喇!

Welcome drink

Ice tea透心涼

酒店一貫老牌酒店作風

露台望到海景

呢度未必係華欣最靚最好既酒店, 但勝在位置方便, 一出去就有好多食肆, 大約行15分鐘就去到華欣夜巿, 酒店連位沙灘, 鍾意去沙灘游水都得!

廁所寛敞

差唔多下晝3點, 拿拿聲出去醫肚

求其揀左間...點知第一餐就中伏

呢兩杯係古古力milk shake? 似係普通古古力奶多D囉...

辣海鮮炒河... D河呢? 就係中間果pat....真係一啖食晒

其實我都冇乜野啱, 但既然入到黎, 就求其食D野, 想快D返酒店泳池hea下...

呢個係辣牛肉沙律...D牛肉好靭, 其實味道未至於難食, 但份量真係少得驚人!

酒店泳池唔算大, 不過D人曬多過游, 所以都好舒服

酒店沙灘, 見到有馬仔騎, 原本諗住留返最後一日朝早騎馬仔, 點知原來朝早潮漲冇得騎喇!

Hea左一個鐘又要返去梳洗出去食飯喇!

去左酒店附近, 網上大獲好評既海邊餐廳...

冬陰公, 酸多過辣

粉絲蝦煲好味!

叫左隻龍蝦, 未夠1 kg, 可惜燒得爭DD, 唔夠熟... (好彩食完冇肚痛) 

芒果糯米飯必食!

食飽飽就去行夜巿喇...

D衫好抵呀!

仲買左柚子, 芒果糯米飯同古古力香蕉pancake做宵夜

食完宵夜仲有下場

就係去酒店頂樓酒吧飲下野....

難得難得...喺香港真係冇乜幾何呢~

黎到呢度先咁有閒情日誌去飲返杯...最重要係消費極低!!

望住簡單樸素既夜景...加上海風吹埋黎, 份外舒服....