記得我臨嫁前, 都特別要求媽媽教我煮家傳薑葱炒蟹同豉油皇煎大蝦... 可想而知我其他野唔識煮唔梗要, 最梗要識整蝦蟹旁身!! 哈哈~!
噚日喺電視見到教煮"星洲黑胡椒炒辣蟹"真係睇到我流晒口水... 今日一於試下整啦!!
黑胡椒炒辣蟹 (貓小玲加加減減版)
材料:
澳洲珍寶大肉蟹 over 斤半 (純粹個人喜好)
葱
原粒黑胡椒
豆豉
蒜蓉
紅辣椒仔
調味獻汁:
蠔油
老抽
糖
水
做法:
我諗呢隻蟹係我買過既最大隻既... 劏蟹其實唔難既, 不過如果咁大隻既蟹, 就要有個男人協助好D, 因為實在要好大力咁劈先得!
首先反轉隻蟹, 喺佢個肚中間劈一刀, 呢個時候佢應該會半死架喇!! (不過呢隻蟹十分橫強, 完全冇想死跡象囉~) 跟住就劈左佢對鉗先, 以防佢向你攻擊, 然後就可以反轉佢, 揭開佢個掩同蟹蓋, 記得喺蟹蓋中取走黑色既胃, 蟹身既鰓, 蟹身切成四份... 用牙刷將整隻蟹刷得乾乾淨淨, 用刀拍碎蟹鉗硬殼, 再撲上生粉備用
將蒜頭切碎, 紅椒切粒, 葱切段, 豆豉洗淨拍扁, 黑胡椒中碎備用
中火下牛油煮溶, 逐一加入黑胡椒, 蒜蓉, 豆豉, 紅椒兜勻, 再落蟹略炒, 加入葱和調味獻汁炒勻後, 蓋上蓋子焗10分鐘, 最後獻汁收乾即成!
鹽焗蝦係參考Blogger既Staub食譜整既...真係易到冇朋友!!
鹽焗蝦
材料:
虎蝦
粗鹽
黑椒
葱花裝飾
做法:
將蝦既手腳同最硬既角剪掉, 去腸洗淨, 吸乾水備用
用Staub煲放大約1.5cm厚的粗鹽, 蓋上蓋子, 用中細火烘6分鐘
放入虎蝦, 略鋪上粗鹽, 黑胡椒, 熄火蓋上蓋子焗10分鐘 (視乎蝦的大小而定)
灑上葱花裝飾即成!
食後感:
第一次煮呢兩味餸, 真係又簡單, 又好味!! 雖然我冇食過正宗既星洲炒辣蟹, 但呢個好香黑椒味, 帶少少甜, 辣度識中, 真係食到十隻手指都啜埋喔!! 睇下個蟹鉗同我個拳頭差唔多呢~
鹽焗蝦初初都有少少擔心係咪真係靠鹽既熱力就可以焗熟D蝦呢? (話晒係虎蝦, 都幾大隻) 點知出黎既味真係好鮮味, 因為剝殼時會連帶D鹽同黑椒一齊帶入D蝦度, 唔駛擔心唔夠味... 而且的確顯示左Staub傳熱保水既實力真係非常了得!!
十分滿意呢餐晚餐!!
睇見都想食呀!!!!!!! 蝦蟹都係我至愛呀............星洲黑胡椒炒蟹......最o岩用大肉蟹....你碟蟹賣相靚過新加坡o個d 添呀~~~~
回覆刪除[版主回覆07/03/2011 10:20:00]我都係見你煮薑葱炒蟹, 引到我流晒口水, 所以都要食蟹囉!! 哈哈! 好期待去新加坡狂食呀!
好豐富呀!!! background 仲有鮮花 happy anniversary!
回覆刪除[版主回覆07/03/2011 10:27:00]望住D鮮花心情都靚D呀!! 哈哈~ THX!
So mouthwatering ahhhhh
回覆刪除[版主回覆07/03/2011 10:25:00]
WAH... 不得了, 睇到都流曬口水呀. 我好鐘意食蟹架, 但一次都未做過, 下次TRY 下先
回覆刪除想問下你果汁酒係點做架
[版主回覆07/04/2011 10:09:00]真係好容易煮架咋! 喺屋企食蟹特別滋味呢~
果汁酒係Sangria, 我喺惠康買架! 再自己加D蘋果, 橙, 車厘子既生果囉... 如果想自己溝, 就用紅酒, 雪碧/7-up, 冧酒同生果加埋就得架喇~
高手.... 勁 !!!!
回覆刪除你中間既 candle 係 ............ ????
[版主回覆07/04/2011 10:02:00]梗係唔係咩高手啦...你見D步驟其實好容易架咋~! 你都試下煮丫!
中間係浮水蠟燭黎架!
我下星期要試煮呢味蝦！
回覆刪除[版主回覆07/04/2011 09:32:00]煮啦煮啦! 真係又好味又容易呀!
好靚呀~~ 仲有個飲品係咩嚟ga?
回覆刪除你咁愛蝦蟹, 有bb 前盡情食多d, 第時要戒口ga~~
[版主回覆07/04/2011 11:14:00]飲品係Sangria, 我喺惠康買架! 再自己加D蘋果, 橙, 車厘子既生果囉... 如果想自己溝, 就用紅酒, 雪碧/7-up, 冧酒同生果加埋就得架喇~
好似真係好簡單喎, 我下次都係要試下蝦先!!
回覆刪除[版主回覆07/04/2011 17:04:00]真係勁簡單方便呀! 一定要試下呢~
見到 ' 星洲黑胡椒炒蟹 ' 都好想食呀
回覆刪除謝謝分享用Staub煲 示範煮出美味虾蟹。
[版主回覆07/06/2011 15:11:00]你都試下煮丫!
嘩，睇落好好味！！ 你整蟹個wok係LC黎架？
回覆刪除[版主回覆07/11/2011 09:49:00]食落都好好味架! 你都試下整丫~ 係呀, 個wok係LC呀!