賀年自家製蘿白糕

臨近新年, 我都整返D賀年食品先!!

記得又係中學家政堂學過整蘿白糕... 一於搵返當年既食譜跟住做先... 而家已經變左張發黃既古董喇~ 哈哈!!



材料方面自己貪心D, 加多左冬菇同瑤柱...



蒸之前



蒸之後

雪一晚後煎黎食



自家製足料蘿白糕


材料:

白蘿蔔　　　　　2斤
沾米粉 　　　  125g
澄麵　　　　　　15g
臘腸　　　　　　2條
冬菇　　　　　　6隻
蝦米　　　　　　隨意
瑤柱　　　　　　隨意
水　　　　　　　1.5杯
米酒　　　　　　1湯匙
9吋錫紙盤　　　  1個

調味料:

鹽　　　　　　　半茶匙
雞粉　　　　　　隨意
糖   　　　　　 1茶匙
胡椒粉　　　　　1茶匙
麻油　　　　　　1茶匙

做法:

1. 冬菇,蝦米, 瑤柱浸軟 (保留部份浸過的水)
2. 白蘿蔔去皮刨絲 (保留蘿蔔的水份)
3. 將臘腸, 冬菇切粒, 瑤柱切絲
4. 將浸過冬菇/瑤柱的水+清水 (共1.5杯) 篩入沾米粉和澄麵拌勻成糊狀, 備用
5. 燒紅鑊, 下油, 爆香蝦米, 臘腸, 瑤柱和冬菇, 下酒
6. 加入蘿蔔絲和調味料炒均
7. 加入麵粉糊拌均至收乾水
8. 倒入已掃上油的錫紙盤內
9. 大火隔水蒸1小時, 用牙籤喺中間桔一下, 若冇黐住即成!!
10. 放涼後, 放入雪櫃雪一晚, 第二日就可以煎黎食喇!

* 澄麵可在雜貨舖買

食後感: 自己整真係特別足料, 同埋冇喺街買咁多粉咁實, 不過我覺得可以加多少少粉, 等佢感覺冇咁"削", 煎果陣容易D... 咁多年後再整都算係咁上下喇!! 下年再努力啦!

喺度同大家拜個早年先!!

祝大家

身體健康!!
步步高陞!!
萬事勝意!!
笑口常開!!