生日大快樂!

2014年12月25日 (四) (雨)

到我生日喇!

根據上年，前年同大前年既生日路線

都不外乎睇戲，尖沙咀燈飾，中環聖誕村，晚飯

其實真係幾攰

今年我只想瞓到自然醒

夜晚夠鐘先出去食晚飯

起身已經好晏

去左新開既小松鼠食lunch

餐飲我揀左藍莓乳酪特飲，味道淡如水

我既All day breakfast 

份量比一般既少d

但佢吸引我之處係有egg benedict喎!

可惜荷蘭汁好酸, 完全影響晒個味道...

哈米波波個煙肉芝士Burger就似返D樣, 個包好脆, 裏面既餡料都份量十足

夜晚去左韓國過江龍既新麻浦海鷗烤肉

之前去韓國時食過翻尋味, 知道佢喺香港開分店都好想去試下

話說我早幾個星期就開始打電話去book位

但打極都冇人聽, 留言又滿晒...正當我地諗住放棄book位, 早D去排隊walk-in既時候

哈米波波竟然喺23號打通電話仲俾佢book到, 實在太幸運喇!

不過要食第二輪8:40pm

是日只得X'mas set, 比平時貴一百蚊左右, OK啦~

我地叫左牛/豬二人set

同韓國有少少分別~

喺韓國食烤蛋係店員放蛋汁, 自己放泡菜同芝士

但呢度就預先放好泡菜 (我食唔出有芝士), 再放蛋汁

前菜方面, 韓國沙律係用類似柚子既醬汁

呢度就用黑芝蔴醬, 兩樣都好味!

即叫即燒既火炙霜降牛肉壽司

套餐跟既奇怪餐飲

紅色係梨汽水, 綠色係青提子汽水

我都係選擇啤一啤好D

食物由三層架剩載

頂層有大蝦, 鮑魚, 帶子同菇菇

牛霜降肉, 新麻浦護心肉

新麻浦秘製排骨

每款肉都好好味! 我覺得牛肉比喺韓國食仲好味添~

用生菜包住牛糕, 烤肉, 加埋辣醬... 簡直一舊接一舊咁食

呢度仲有教另一種食法

就係用醃蘿蔔包住烤肉, 酸酸地既蘿蔔, 有效減低烤肉既肥同滯, 好正!

仲可以免費refill

烤蛋烤到個邊有少少香脆....實在太美味喇!

最後仲有士多啤梨韓冰, 有D似雪花冰, 有好多士多啤梨, 食極都唔完呢!

返到屋企仲要食埋我既生日蛋糕

我揀左佢地signature既Mont-Blanc同Choc Africain

Mont-Blanc面層係幼滑栗子忌廉蓉, 裏面有鮮忌廉, 配底層既蛋白脆餅係完美既組合

只不過對我黎講味道超級甜...自己一個只係勉強食晒

反而呢個Choc Africain我就好喜歡喇!

裏面有非洲純黑朱古力mousse加上微苦既黑朱古力忌廉....啱晒我杯茶!

今年最驚喜係收到哈米波波送既兩份生日聖誕禮物!

呢份生日禮物其實早喺11月時已經送左!

新出既淺粉紅色超鍾意!

我曾經隨口講過... 好想搵次好輕便咁去旅行 (唔駛攞住大機咁重)

原來佢一直有記喺心... 送左呢份好合心意既聖誕禮物俾我! 

以後我可以日日帶住相機出街影相喇!

多謝您哈米波波!