木婚漫遊巴塞隆拿 (Day 3) ~ 吹吹地中海風

2015年10月2日 (五) (晴)

{Sitges > Magic Fountain of Montjuic}

今日一起身走出露台就見到大晴天

啱晒今日去海邊吹吹風呢~

早餐既地方好舒服

我地特別揀左坐窗口位 (不過張枱好細, 有D迫)

雖然唔係自助餐, 但佢既份量都多到食唔晒!

有幾款唔同種類既包包, 烚蛋, 乳酪, coffee, tea, orange juice

我地由Passeig de Gracia出發, 呢個係個大站, 係地鐵同火車既交界點

因為今日要去近郊既Siges, 所以要搭火車

而張T-10係去唔到果個zone, 所以記得另行買飛呀!

唔駛一個鐘就已經去到Sitges

Barcelona係沿海城巿, 所以當初plan行程時, 

就好想搵個近郊既海邊小鎮行下

較出名既就係Sitges同Tarragona

不過Tarragona遠少少, 又要轉車, 所以最後只係去左Sitges

火車站旁邊有間遊客中心, 可以喺果度攞份簡單地圖

不過其實呢個小鎮好細, 基本上用唔著地圖呢~

我地隨意咁行...跟住海風吹黎既方向, 好快就已經到達海邊喇...

可能呢日係平日, 所以比較少人, 好有悠閒寧靜既感覺... 相信假日會有好多本地人黎渡假游水, 變得好熱鬧呢~

我地喺海邊揀左間餐廳就坐低食lunch喇!

望住地中海, 真係特別舒服...(好有honeymoon時去希臘既feel啊!)

我地叫左兩個set lunch, 餐牌只得西班牙文, 所以有D都係估估下

其中誤打誤撞就叫左個西班牙凍湯, 又好fresh好好味喎! 啱晒呢日咁熱既天氣...

沙律都唔錯呢~ 

主菜係墨汁海鮮飯

食完lunch, 就漫無目的地週圍行...

呢度仲有D特色建築

好有摩洛哥風味

行到攰, 又食杯雪糕唞下

優優閒閒又過一日...夜晚返到Barcelona巿既Placa Espanya

欣賞音樂噴泉

話說我上網搵資料時, 見到有人推介呢個大型音樂噴泉

但網上冇乜其他資料介紹, 而開始時間就寫7pm, 每半小時一節

我地大約7:30pm去到, 見好多人坐晒喺度等 (唔通真係咁好睇?)

點知等了又等...等到8pm...8:30pm都未開始...正當想走之際

9pm就終於開始喇...噴泉既水真係噴到幾層樓咁高, 仲有燈光同音響效果配合...

我只可以話...如果我係路過既...都會停低睇兩分鐘既...

其實未散場我地都閃左喇...

成十點都未食飯...於是又求其入左間餐廳食Tapas

點知今次中伏了...

點左野食之後...我開始覺得唔係好舒服...可能我呆坐左個幾鐘...又俾D風+噴泉水花吹一吹

咁就中招喇...食左一件已經嘔肚大作...

之後全部俾老公食晒...而佢既結論係呢間最難吃...

成jar Sangria都係靠佢飲晒...好彩佢冇醉啫...

返到酒店又暈又嘔...食左藥要拿拿聲瞓覺喇....

而原本收到sms話個喼會呢晚11點至1點送返黎...

奈何因為呢度冇24小時front desk, 老公就一直睇住個露台, 睇下見唔見樓下有車到...

點知一直都未等到.....