好耐冇下廚... 今晚決定整個想整好耐既南瓜湯!! 今次係我第一次煮南瓜湯...真係估唔到原來南瓜係咁硬架!! 每劈一下都好似同佢搏鬥咁... 救命!!
打格仔失敗既牛扒... 究竟係我個grill pan坑紋唔夠深丫, 定係火力唔夠呢? 淨係煎到斜紋咋~
仲有忌廉焗薯仔, 呢個食法都好好味!!
忌廉南瓜湯
材料:
南瓜 1個
洋葱 1個
雞湯
水
淡忌廉
rosemary
牛油
黑椒
鹽
做法:
1. 將南瓜去皮, 去囊, 切粒
2. 洋葱切粒
3. 用中火煮溶牛油, 炒香洋葱, 加入南瓜粒略煮
4. 將雞湯加入至蓋過南瓜2/3, 加入清水至蓋過南瓜, 煲至南瓜熟透變淋
5. 加入忌廉, rosemary, 黑椒及鹽, 煲至微滾
6. 用攪拌器攪至幼滑即可
7. 上面可加淡忌廉及白松露裝飾
食後感: 我就好鍾意個味道喇! 真係好香甜, 又滑, 又夠蓉... 可惜哈米波波對南瓜麻麻地... 唔識欣賞!! 哼~!
P.S. 之前講過我係用手提式攪拌器, 再加個中間有個窿既膠片, 就可以直接放喺煲內攪, 十分方便... 等我俾大家睇下咩叫"中間有個窿既膠片"啦~ 就係咁喇! 喺Citysuper有售
南瓜湯看來好幼滑~~~
回覆刪除[版主回覆05/21/2011 10:27:00]自己整真材實料, 不過飲完都幾飽~
請問嗰個手提攪伴機好用嘛？幾錢呀？如果唔用個蓋，係咪會彈晒啲嘢出嚟呢？thx!
回覆刪除[版主回覆05/21/2011 11:16:00]我覺得好好用, 好方便呀! 又可以打蛋, 碎肉... 我喺百老匯買, 大約4xx蚊 (大size)
http://www.philips.com.hk/c/hand-blender/28037/cat/zh/#filterState=HAND_BLENDERS_SU_HK_CONSUMER%3Dtrue;filterState0=HAND_BLENDERS_SU_HK_CONSUMER%3Dtrue;tabState=0
如果唔用塊膠板就好易彈出黎架, 或者用個煲蓋擋一擋囉~
應該你係唔夠熱, 你係咪用LC Grill pan?
回覆刪除[版主回覆05/21/2011 22:43:00]謝謝! 下次要再燒紅D先得... 我唔係用LC個grill pan呀... 但LC係咪唔可以就咁乾燒, 會破壞D琺瑯架?
LC 落咗油就要燒佢4-5mins, 佢個blog 有教的.
回覆刪除[版主回覆05/21/2011 23:46:00]icic... thank you~!
見到都想食...好得呢~~我都好鍾意整野食架.....
回覆刪除[版主回覆05/22/2011 18:59:00]多謝鼓勵呀! 我係新手黎架咋~
無錯, 個南瓜真係好難劈~
回覆刪除[版主回覆05/23/2011 09:57:00]整得咁辛苦, 但老公又話其實麻麻地鍾意南瓜既味... 睇黎都冇下次架喇~ 唉!
你煮西餐真係好拿手呀! 次次都整得咁靚!
回覆刪除[版主回覆05/23/2011 09:53:00]可能我鍾意食西餐啦~ 所以都比較有興趣煮d...哈哈!