趁住秋風起...自然諗起想食煲仔飯... 一於整個愛心冬菇臘腸雞飯啦!!
材料:
雞肶肉 (切件) 1塊
冬菇 (切粒) 6隻
臘腸 (切段) 2條
米 1.5嘜
水 1.2嘜 (即水是米的八成份量)
煲仔飯豉油 適量
醃料:
豉油
糖
胡椒粉
粟粉
米酒
做法:
1. 將所有醃料醃雞肉半小時
2. 水放入Staub煲內煲滾
3. 放入米, 鋪好, 蓋上蓋子用中細火煮10分鐘
4. 將餸鋪上飯面, 蓋上蓋子再用中細火煮10分鐘
5. 熄火, 焗10-12分鐘, 加煲仔飯豉油食得!!
食後感: Staub呢個煲真係好正! 煮煲仔飯唔黐底, D飯仲一粒粒啱啱好呢~ 好味道啊!! 想個飯更香, 可以留起少少浸冬菇水加埋去煲飯 (水既總份量都唔可以多過米既八成), 咁就仲正喇!! 下次一於煮埋我拿手既有味飯, 即再加埋蝦米, 瑤柱撈埋一齊... 冬天食一定暖笠笠呢!!
攪到我都好想食!! 水:米的比例 0.8:1 就得㗎啦? (我平日煮米飯係 1.5 : 1 , 少啲水係因為啲水無得蒸發?)
回覆刪除[版主回覆10/10/2011 09:55:39]係呀, 佢自稱保水功能好, 所以唔駛太多水都得囉! 同飯煲煮既份量唔同架!
你係咪有staub 的鑊呀?好唔好用呀, 同黑金剛有無分別呢?
回覆刪除[版主回覆10/11/2011 10:20:17]我隻鑊係LC黎架! 我冇用過黑金剛, 所以都唔知有咩分別! 我覺得煮d要收汁既餸係唔錯的, 但如果炒飯(易黐底), 我都係用返易潔鑊囉..同埋果隻鑊個蓋係玻璃蓋, 較扁身, 有時想蒸餸都唔夠高囉~
心心煲好靚~
回覆刪除[版主回覆10/11/2011 10:09:07]我都好鍾意呀~ hehe
好味道呀~~~!!! 呢個煲同砂煲煮出黎有無分別GA?? 個煲好靚呀.......
回覆刪除[版主回覆10/11/2011 10:06:57]我估最大分別係呢個煲煮完係冇飯焦囉...(只係個邊邊有少少, 但唔會黐到實晒果隻)
個煲好靚...
回覆刪除[版主回覆10/11/2011 10:52:01]可以成個煲上枱...食飯都開心d...哈哈!
this 煲 looks so pretty, is the size adequate (looks quite small in pic)?
回覆刪除[版主回覆10/12/2011 09:57:39]二人份量都夠架! 可以煮到四, 五碗飯呢~
咦, 原來staub 都有heart sharp ka wor~
回覆刪除[版主回覆10/14/2011 14:23:40]係呀...個形仲好靚添~