遊瀑布

2014年3月2日 (日) (間中微雨)

繼上星期遊完水塘之後,

今個星期就約埋兩個朋友去遊瀑布

11:30am喺大埔火車站等, 然後搭64K巴士到梧桐寨站落車

落車後會見到呢個路牌, 沿住行入去就冇錯喇!

沿路都有唔少路牌指示去瀑布既

行到士多附近, 有隻四蹄踏雪既貓BB好熱情咁走過黎, 喺我地D腳度團團轉, 好嗲嗲呀!

小小貓BB入世未深, 完全唔驚人, 仲碌地討野食...可惜我地身上冇啱佢既食物啦!

同貓BB say good bye後, 我地就繼續往上行

好快就見到萬德苑 (呢度係必經之路, 所以跟住萬德苑既指示牌走就啱喇!)

萬德苑旁既小型瀑布

過左萬德苑就會見到往梧桐寨既入口路線圖

梧桐寨共分四個瀑布, 首先經過井底瀑 -> 中瀑 -> 主瀑 -> 散髮瀑

努力向上行, 呢度D梯級唔算難行

望返過去萬德苑, 都幾大架!

呢度係屬於大帽山郊野公園範圍

當然係跟住瀑布既指示行啦!

大約行二十分鐘就會去到第一個瀑布 ~ 井底瀑

井底瀑係最底層, 所以相對較細, 流水少D, 落差亦冇咁大

但行近瀑布既石都好濕滑, 要小心D行啊!

不過溪水好清澈

跟住我地就上返去搵中瀑, 只係行左十五分鐘就到喇!

行到中瀑開始落住毛毛雨, 加上全日濕度好高, 又濕又熱, D汗水好似瀑布一樣嘭嘭聲咁流

比起上星期烈日當空咁行仲要辛苦

但見到呢個瀑布, 都總算值得既!

有遊人仲除鞋落水玩自拍濕身寫真... 

水花濺到成個鏡頭都係

原本想繼續行上去主瀑, 但雨越落越大, 天雨路滑, 怕上山容易落山難, 只好放棄...

唯有原路折返lu...

回程當然要慰勞下自己啦!