流浮山海鮮餐

2014年7月26日 (六) (晴)

今日同爸爸媽咪慶祝生日

上兩年都同佢地去左酒店中菜廳食飯

但鍾意飲啤酒既佢地, 見到酒店啤酒既價錢就話唔抵, 飲得唔夠暢快

今年就同佢地去流浮山食海鮮, 可以盡情啤啤佢

早左入黎行下海味街先

行到盡頭就到左從前既蠔田

水退既時候好似行到去對面深圳一樣

蠔殼牆

今晚就去呢度食喇~

喺流浮山黎講, 呢間既門面同裝修都比較新

去到酒樓之後, 就有人帶我地去揀海鮮喇!

先黎個例牌豆腐芥菜魚湯

西芹炒龍蠆球 ~ 龍蠆肉好滑, 皮與肉之間膠質豐富好好味! 

椒鹽豆腐 ~ 我好鍾意食呢個餸架! 以前去大排檔食飯最常叫呢~

呢度炸得好脆, 辣辣地好味!

蒜蓉粉絲蒸扇貝

豉汁炒蟶子 ~ 蟶子爽口, 豉汁冶味! 連洋蒽都食埋!

辣酒煮花螺 ~ 唔夠辣, 冇乜特別

主角係椒鹽瀨尿蝦 ~ 瀨尿蝦有分硬殼同軟殼, 用黎椒鹽的話兩隻都適合

我見軟殼大隻D, 所以就試下軟殼瀨尿蝦喇!

隻隻都長過對筷子, 粗過我手腕架!

而且隻隻仲爆晒膏! 一人一隻已經飽晒喇!!

最後仲有馬豆糕同橙...超滿足既一餐!