哈米波波生日前奏

2014年6月20日 (五)

哈米波波舊曆生日，問佢想食咩

佢話菠蘿生炒骨/咕嚕肉

左搵右搵，諗住同佢去新蒲崗得龍

後來俾佢再揀，又話食日牛涮涮鍋

好啦！我食咩都冇所謂既

今次叫左較貴既和牛

好似同普通既差唔多

6月21日 (六) (晴)

奶奶同哈米波波慶祝

去左KSL既Lobby lounge食tea buffet

可以由1pm食到5pm

啱晒同朋友黎吹水呀！

食物種類唔算十分多，但每樣都幾好味!

牛柳好好味!

有好多款精緻沙律前菜

仲有我最愛既scone，有焗暖住好貼心呢！

果汁，茶都好多款選擇

甜品蛋糕yummy

最驚喜係有心太軟

去開尖東一定要探下忌廉哥同妹妹啦！今次終於見到妹妹真身喇!

6月28日 (六) (晴)

呢日輪到爸爸媽咪同女婿慶祝

我見匯豐做梗美心既promotion好似幾抵咁

於是提議去又一棧食飯

每位既餐具都有唔同馬既圖案

小食係麻辣青瓜, 少少辣好開胃

杭州芳香素腐方

上海蔥油海蜇頭, 呢個質感好特別, 外層爽口, 但裏面好似啫喱咁, 有D似Q爆感覺

本身海蜇頭好清冇乜味,要點附上既芥末一齊食... 但我點左餐前小吃既辣汁, 味道更夾喎!

瑤柱冬蓉羮

油泡蝦球玉帶 ~ 隻碟大得誇張

上湯浸時蔬

北京大紅袍松鼠黃魚

烤北京填鴨一隻 ~ 估唔到四人套餐裏面都俾一隻填鴨, 仲要好大隻呢~

而鴨身仲可以俾我地打包攞走

無錫灌湯小籠包 ~ 小籠包皮薄多汁, 就算我咬一小口, 飲左裏面D汁後, 再咬一口小籠包

裏面依然充滿肉汁

北京韭王肉絲炒拉麵

香滑椰汁糕

四個人食到捧住個肚, 好滿足呢~