即興去三聖

2014年9月13日 (六) (晴)

其實搬左入黎大西北之後, 都講過話想去下三聖食海鮮

但一直都冇去過, 星期六哈米波波突然提意就即興去啦!

去到已經七點幾, 見到呢個牌坊就知冇黎錯地方喇!

三聖邨既海鮮檔比起鯉魚門, 流浮山雖然少好多

但海鮮種類都唔少呢~

第一次黎盲中中... 平時去開既都係先去酒樓坐低, 再會有人帶你去揀海鮮, 酒樓同海鮮檔都有聯系既...但原來呢度剛剛相反, 係先買海鮮, 再去揀你心儀既海鮮酒家煮既

呢度有大間既酒家

又有由冬菇亭改建既酒樓

甚至大排檔都有

我地喺海鮮檔來來回回睇左幾次, 揀好海鮮就叫海鮮檔介紹酒樓 (想去果間酒家full左)
呢間棠記日頭係快餐店, 夜晚就係海鮮菜館

椒鹽瀨尿蝦, 海鮮檔既伙記都幾老實, 佢話兩個人食呢款泰國中型既瀨尿蝦就夠喇! 每隻都係四, 五十蚊, 好抵食!

西芹炒龍躉球

油鹽水浸蝴蝶蚌, 呢隻蝴蝶蚌我第一次見, 海鮮檔都話呢隻唔係成日有架...又真係幾鮮甜大隻, 冇介紹錯

打開個殼之後真係蝴蝶形架~

鹽焗黃油奄仔蟹, 雖然係奄仔蟹, 但都算幾多肉, D膏都好甘香, 又係第一次食鹽焗蟹, 原來咁整都好好味呀! 等我都試下自己整先!

飯後梗係要食埋甜品先夠滿足啦!

喺想叫乜冇乜既情況下...叫左薑汁燉奶...原本想叫熱, 但冇只好食凍, 都幾好味

超大碗芒果冰

上個月去完流浮山, 難免會同呢度比較既.... 我覺得海鮮檔就呢度整齊乾淨D, 種類亦算幾多選擇, 而呢度既先買海鮮, 後揀酒家既方式好處係可以逐間海鮮檔慢慢揀... 壞處就係萬一買晒海鮮, 但想去果間酒樓冇位, D海鮮就要放喺門口一齊等位...感覺上冇咁好安排 (除非一早訂枱啦)

至於味道方面, 我地就覺得流浮山煮得好食D喇!

價錢呢~ 其實兩度差唔多都幾抵食啦!