52 ~ 大姆指與小南國

2015年2月1日 (日) (晴)

潛左水兩星期去左邊?

話說兩星期前既星期日

哈米波波準備煲蕃茄薯仔粟米湯

突然...喺廚房傳黎一聲慘叫聲

於是我即刻跑入廚房睇下佢做乜啦~

我見到佢豎起左手手指公, 右手握住左手, 表情痛苦好似標童咁跳跳下

望真D佢成手鮮血, 原來切親左手手指公

好彩佢雖然又怕痛又怕核突野, 但為左保住隻手指公

佢都仲好冷靜咁衝入廁所沖洗傷口

我就即刻攞手袋, 幫佢攞埋銀包就落樓截的士去醫院 (唔知點解果一刻冇諗到call白車, 好彩一落到樓就有的士啫!)

去到急症室好快就可以見醫生, 果一刻我先真正睇到佢傷勢

原來只係差5mm就切斷手指公頂, 照左x-ray, 知道切斷骨, 要轉介去屯門醫院骨科留醫

就係呢把兇器

唔好話佢...連我自己都覺得好似發梗夢咁...

第二朝諗起果一刻既情景都打冷震

所以呢兩個禮拜, 我都要負責做晒家務, 煮飯... 安撫佢既情緒, 做佢既心理輔導員...

更加冇心情寫blog啦!

而家剛剛前日拆左線, 開始康復都冇咁擔心...

講完呢單血光之災之後...

講返結婚52個月

由於哈米波波仲要戒口, 唯有清清地去食上海菜啦!

去左屯門小南國

我要左杯花茶

開花喇~ 甘甘地, 有少少似龍井

前菜係爽口菜甫

腿茸津白 ~ 腿茸未免太孤寒吧?! 少得可憐...而且淡而無味

咸肉菜粒炒飯 ~ 亦係一道好啱病人食既飯...一個字"淡"

椒鹽小黃魚 ~ 炸到外皮脆卜卜, 裏面唔乾身, 連骨都可以食埋呢~

小籠包 ~ 皮唔算十分薄, 但裏面湯汁鮮味

原本想叫香蕉高力豆沙, 但原來呢間冇的

於是叫左香蕉豆沙窩餅

味道唔太甜, 食多兩件都唔覺膩, 可惜煎得唔夠香脆

因為落錯單...所以食完甜品先送上既薺菜魚羹... 

只想講...唔知係我地叫D餸既問題定咩...

硬係覺得呢間比其他分店都較遜色囉...