小心黑店

新年流流唔想喺blog鬧人, 所以而家先post出黎...自問EQ都算高既我, 都忍唔住... 我真的憤怒鳥

年廿九, 我同哈米波波下晝諗住去維園行花市, 於是去左大坑果度搵食, 哈米波波見到呢間J-Dog小店, 佢話想食熱狗, 於是就入去啦, J for Japanese, 即係日式熱狗, 店內大約得十個坐位, 而店內只有一名負責煮野食既員工, 門口有一部自動售賣機, 每款食物都有一個編號, 只要喺右手邊按食物編號, 再用八達通付款, 便會跌出一張食物卡到櫃枱取食物, 當中並沒有任何指示, 亦沒有表示可以付現金, 於是我就負責買野食, 先按了哈米波波的套餐和我的熱狗, 亦分別跌出食物卡, 到我再想按雞翼時, 發現銀碼不同, 才知道按錯食物編號, 過了數秒後, 銀碼消失, 我再按正確的編號後, 便用八達通啪卡, 但此時沒有跌出食物卡, 於是我告訴店員, 店員全程冇笑容, 黑口黑面:

我: 唔好意思, 我頭先啪左卡, 但冇跌出食物卡, 係咪小食唔會出卡呢?
店員:　唔會架喎, 係咪你張卡冇錢呀?
我: 我張卡係自動增值, 唔會冇錢架喎... 可唔可以check返呢?
店員: 我地部機冇得check架喎! (另返轉頭繼續煮野)

我當時好無奈, 好似口同鼻抝咁... 原本想買其他食物同飲品都唔敢買住...

過一陣, 店員開左部機, 按左食物編號, 真係有張卡跌出黎...

店員: 部機冇問題喎...
我: 但我頭先真係啪卡後有紅燈同嘟一聲架喎...
店員: (咦咦哦哦) , 你download個八達通查詢結餘app黎check下先啦

我同哈米波波唯有搜尋下呢個app啦, 但根本冇呢個app, 我地問佢個app叫乜名, 會唔會係得Andriod機先有?

店員: (繼續咦咦哦哦) 我唔知喎... 一係你地一陣去返地鐵果度check下交易記錄囉, check到有收多錢就俾返你

此時我已經好嬲, 氣頂上心口, 但又唔想黑面, 因為我知道我一黑面, 哈米波波一定比我更黑, 分分鐘連野都唔食... 於是唯有暫時放低我既怒火...

呢個係哈米波波既套餐...熱狗係紫菜燒汁沙律醬, 配漢堡飯



我既七味粉辣熱狗

哈米波波問我去唔去check下交易紀錄, 我話當然check啦, 無論有冇過錢都好, 都得個知字嘛...於是又行返五分鐘去天后地鐵站, 果然真係扣多左我28蚊!!!!!! 我地又行返去舖頭同店員講, 但先施施然俾返28蚊我, 連一句對唔住或唔好意思都冇講! 我都冇好氣同佢講甚至鬧佢...

之後上openrice, 發覺原來有一半人都投訴店員態度差, 有人亦同我一樣啪卡後冇卡出... 間店冇好好管理部機係咪運作正常, 冇得check交易紀錄不特止, 店員全程黑面態度, 部機出錯連基本道歉都冇, 簡直不知所謂!! 仲要食物不外如是...唉.... 講完!