香辣大蝦意粉

連續幾日都出街食飯, 仲要食左好多紅肉

今日想食得清D, 但又諗唔到食乜...

突然醒起媽咪俾左D急凍大蝦我地

於是放工餸都唔駛買就可以返屋企喇!

不過煮完D意粉又好似唔係好夠食... 老公提議出去食甜品, 順便可以散下步...

"飯後散步同食甜品"係結婚前講過最想婚後會做既事...

但印象中好似十隻手指數得晒...

趁而家天氣涼左, 又可以多D去散步喇!

香辣大蝦意粉

大蝦           4隻

意粉           2人份

乾葱           1粒

蒜蓉           2茶匙

辣椒           2茶匙

白酒           2湯匙

鹽               少許

胡椒粉       少許

牛油           

橄欖油

做法:

1. 煲滾水下意粉, 鹽, 橄欖油煮10分鐘 (時間根據包裝袋指示)

2. 瀝乾水, 加入橄欖油撈混備用

3. 大蝦去腸, 用少許白酒, 鹽和胡椒粉醃一會

4. 燒熱鑊下牛油, 橄欖油煎大蝦, 下白酒煮至全熟, 盛起

5. 用同一個鑊, 爆香乾葱, 下蒜蓉辣椒爆香, 下鹽調味, 最後下意粉兜混至熱透即可

食後感: 今次用牛油煎大蝦好香, 意粉都充滿蝦味, 秘訣在於煎完蝦後, "唔好洗鑊", 因為鑊裏面留有蝦油, 再用黎煮意粉, 特別好味! 屋企有"家傳蒜蓉辣椒醬", 用黎煮餸, 調味一流, 夠晒香辣!