L'Hotel Buffet

2014年1月29日 (三) (晴)

上星期六去左牛頭角新開既L'Hotel飲

主人家擺西式婚宴

場地同食物都唔錯, 加上主人家既精心佈置, 更加加分!

幾日之後, 哈米波波既同事又話團購去呢間酒店食buffet

於是一個星期就去左呢間酒店兩次喇!

餐廳格調走北歐路線, 感覺同一般酒店好唔同!

其實團購得, 又係細酒店, 都預左唔會有好多野食架喇~

冷盤海鮮有長腳蟹, 青口, 螺同蝦... 不過完全冇海水鮮味

中間果碗係黑松露溫泉蛋

刺身係即切既, 三文魚都幾新鮮好味, 但其他刺身我都麻麻地, 冇食到

是次主題係和牛, 所以每人送上一碟

食頭幾舊都幾好味, 調味亦都唔錯

但之後幾舊都有根

羊架同炸魚都幾好! 燒牛肉一般, 冇乜牛味, 仲有一片上湯浸和牛就好淋

茶碗蒸同忌廉南瓜湯

即炒意粉, 熱辣辣, 味道都OK

哈米波波碟甜品...睇落唔係好吸引

但我反而最鍾意食甜品, 呢碟已經係encore第二碟

最好味係Pavlova, 食左兩大舊

Cheese cake最穩陣

仲有個紅豆綠茶布甸都幾好

不過西瓜就淡而冇味

我好耐冇食過Buffet都唔知價, 但以300蚊食呢餐黎講就真係唔係好值喇~

食飽之後就返屋企樓下個花市行個圈

見有人話有花式棉花糖

貪得意我又買左支

問佢識唔識整花花, 佢話識, 但加錢會多兩隻色, 做出黎仲靚

點知...

咁都叫花真係好失望囉... 咁就坤左我50蚊喇...

同埋中間果一點就叫第三隻色? 真係好賺呀佢...