We。Love。Eat

2014年12月17日 (三) (晴)

今年年頭時去過人氣爆燈既HeSheEat (旺角店)食甜品，
原來佢地短短一年內已經喺銅鑼灣開左分店, 仲新增左正餐添~

梗係要約埋班愛食既靚太去潮聖一番啦！

位於銅鑼灣地帶2樓非常就腳，一上樓梯已經聞到好香既窩夫味喇! 我呢個餓底都毫不客氣點野食呢~ ::mm2373 

先黎色彩繽紛既軟殼蟹西柚腰果沙律

一入口食到好清新既杏脯橙醬味

再食埋軟殼蟹，炸粉夠薄夠乾身，一d都唔覺油膩呢！

你睇! 啖啖既蟹肉，仲要有蟹膏添!

諗起都想再食呀！

又怕凍又想試新野...所以我地share左呢杯綠茶柚子沙冰

原來綠茶同柚子係好朋友黎架! 雖然凍, 但都覺得好好味!

飲完凍要飲返杯暖笠笠既泡沫古古力先!

香濃幼滑, 濃得黎又唔會太甜... 飲多杯都得呢~

呢個係帶子西洋菜枝豆risotto

見到佢用西洋菜, 大家都覺得好特別, 於是就點黎試試

印象中西洋菜雖然個名叫"西洋", 但都係出現喺中菜既多, 仲以為會格格不入

點知味道好夾之餘, 加埋枝豆一粒粒既口感相當好呢~

呢度仲有all day brunch, 陣容頂盛!

有煙肉, 德國鮮肉腸, BB菠菜, 炒蛋, 大磨菇, 牛油果蓉, 薯仔沙律

仲有較特別既粟米餅同慢煮"爆汁"蕃茄, 夠晒juicy!

我地越食越興奮...咁一於唔好俾佢停喇!

墨魚汁魷魚扁意粉

用料十足大堆頭呀! 我鍾意佢有少少辣, 好醒胃呢!

連平時麻麻地魷魚既我, 都忍唔住爬左兩碟呀!

大家見到menu有粗薯條都即刻雙眼發光

冒住增磅風險都要食左先算~

薯條炸得外脆內粉係我至愛既質感

最鍾意佢地連配薯條既醬都肯花心思

左邊係tabasco味既蕃茄辣醬

右邊係Aioli醬, 味道似芝士+蒜蓉洋葱+沙律醬(我自己覺得, 唔知實際成份架!)

食到唔停得口呀!

食完薯條, 又想減低罪惡感...所以要食返個沙律清一清

呢個帶子青蘋果焦糖合桃蜜糖芥末醬沙律就啱晒喇!

微煎帶子配脆卜卜焦糖合桃, 加上新鮮青蘋果...yummy! 

我又可以偷師試下跟佢整下先~~

呢個我自首! 係我見到韓式辣醬炸雞翼而嚷住要叫既... (真係中左韓毒)

雞翼炸得好酥脆, 雞皮同炸粉好似融為一體咁...而且好入味, 裏面仲充滿肉汁添~

韓式辣醬就唔似平時喺韓國店食開果D咁杰身, 呢個似泰式辣醬, 甜甜地, 食唔到辣既朋友都冇問題呢~

終於輪到第二個胃開工喇!

好開心有班鍾意食抺茶既朋友(哈米波波唔鍾意抺茶, 平時好少可以share 食呢)

今次可以盡情咁食喇!

老實講, 我對香港既抺茶都冇乜期望...

估唔到呢度俾我好大驚喜呀! 抺茶窩夫好香抺茶味, 一D都唔hea

加埋大大粒紅豆同楓糖, 真係不得了!

柚子香橙凍, 層次豐富

頂層有乳酪雪葩, 中間有鮮橙, 雜莓醬同消化餅碎, 底層就係柚子啫喱! 

再黎又係我最愛既抺茶心太軟配豆腐雪糕

好似頭先所講, 之前食過其他既抺茶心太軟唔係太甜就冇抺茶味

但見到呢個咁深綠色已經放心晒...

一切開抺茶岩漿擁出...就係佢喇!! 係我鍾意既抹茶味呀!! ::mm2217 

合埋眼就諗起喺宇治食果杯抹茶雪糕一樣既味道! 真係想連碟都舔埋...唔係講笑! 哈哈!

抹茶控必食!!

呢個係招牌梳乎厘, 每日都會有唔同既口味, 今日係蘋果金寶梳乎厘

蘋果金寶同梳乎厘都食得多, 但兩樣加埋一齊就真係第一次食喇!

一上枱真係嘩嘩聲! 點解可以升得咁高既?? 足足有成隻杯既高度呀!

面層灑上金寶脆脆, 裏面就有蘋果果肉, 梳乎厘就充滿蛋香, 一次過滿足晒兩個願望!

最後芝士蛋糕泡沫, cheese cake俾人感覺好heavy, 但呢個絶對係食幾多都唔覺膩!

今餐真係超滿足, 食下傾下就食左三個鐘喇! ::mm2442
希望好快又有機會再食過!!