熱辣辣宜蘭夏令營 Day 2 ~ 饗宴鐵板燒慶生

2013年6月30日 (六) 晴

上回講到去完"下一站幸福"拍攝場地hea之後, 大家都好想搵個地方飲杯野, 最好可以嘆下冷氣添啦~ 但我地呢D城市人實在太天真喇... 黎到鄉村地方, 莫講話冷氣, 連一間似D樣既小食店都唔係咁易, 好彩俾我地搵到附近有一間, 食下刨冰, 冰豆花... 不過呢間就麻麻地喇...



有團友每日都有食蕉習慣, 黎到台灣第二日已經嚷住要買蕉食喇...

而我就發現附近有間阿婆葱油餅, 講到全國冠軍咁犀利, 梗係要試下啦... 即叫即煎, 都要排左差唔多半個鐘先有得食架!

冠軍即係冠軍, 加左蛋同辣醬既葱油餅果然好好味! 比起前一晚夜市食到既又乾又硬, 簡直差天共地呢~

買完葱油餅, 我地又馬上搭車去今晚晚飯既地方, 就係呢間饗宴鐵板燒喇! 據聞連周杰倫都專程黎食, 加上老闆對食材方面好嚴謹, 每日出海攞最新鮮既海鮮, 不時不食, 淨係呢份誠意都抵讚啦! (有興趣仲可以去誠品買返本呢度老闆出既"饗宴"書藉添)



另外, 老闆仲自製好多特別醬油, 醬料, 為食物繡上添花...

講到咁好, 真係好期待呀! 呢位就係我地既大廚, 佢細心又搞笑, 雖然冇左好似香港既花式表演, 不過一樣食得好開心!

餐廳外係一條堤壩, 好多人喺上面踩單車呢...



先黎開胃水果... 原來台灣係將水果當前菜架喎... 有梨, 蓮霧, 菠蘿同D nuts



開始煮喇... 蝦的確好新鮮, 有D仲會跳既... 但比我想像中細隻好多啊!

珍寶帶子呢個size就差唔多喇... 啖啖肉, 大廚專登無將佢煎至熟透, 所以仲好嫩滑...

 

刺身有蝦同唔知咩魚, 不過我食唔慣魚生連皮食囉...

老公唔食刺身, 所以專登做左呢個焗花枝扒, 未食過咁厚肉既花枝扒, 雖然咁厚, 但一D都唔韌, 上面有D焗蒜蓉, 超級好味!



新鮮竹筍, 大廚可能怕我地聽唔明, 佢會周不時攞部ipad出黎介紹食材添~

 

煎櫻桃鴨胸沙律, 櫻桃鴨係來自英國既櫻桃谷而得名, 櫻桃鴨體積比一般鴨大, 鴨胸好厚肉, 脂肪比例剛剛好, 又係宜蘭必食美食之一

新鮮活鮑魚

吞拿魚扒有兩種食法, 一係點醬油, 另一個食法係芝士包住, 我就揀左後者, 用芝士粉烤成薄片再包住吞拿魚, 考技巧之餘亦好特別, 做出黎好似鳯凰卷呢~

呢隻係煎白鱔, 平時我唔鍾意食蒸鱔, 一來外表唔討好, 又多骨, 又腥, 但係呢個我覺得好好味, 呢條鱔好大條, 啖啖肉, 點上佢地自家制既醬油, 真係唔錯!

海鮮酥皮濃湯... 酥皮好酥化, 不過味道偏甜, 侍應話就算唔飲晒D湯都要食晒塊酥皮呢~

老公既海鮮味噌湯



香煎紅喉... 黎呢度之前, 知道大部份都係食魚, 我初初都有少少擔心, 因為我怕會好多骨, 但原來全部都會起晒骨之餘, 仲煮得好好味!



海膽醬焗龍蝦, 又係好美味既一度菜, 不過老公就話麻麻地海膽醬喎...

 

呢個唔係普通既薄燒牛肉, 而係裏面包住左舊鵝肝既... 一口咬落去, 裏面既鵝肝甘香味出晒黎!!

食到呢度再黎返杯洛神花茶消消滯

好...又繼續食... 蒜片牛柳, 蒜片炸得好脆, 牛柳點少少鹽已經好好味!

食到呢度, 大家已經好飽... 有團友問大廚下一道菜是什麼? 大廚話: 是秘密...  (要知道秘密既普通話同咪咪相似) 於是大家又喺度大講有味笑話

老公仲大大聲同大廚講: 你既秘密(咪咪)有多大? 大廚做出很大既手勢... 哈哈...

原來下一道菜就係XO醬炒飯, 大家對住炒飯都投晒降, 唯獨得三位男士依然繼續咁有食力, 大廚仲將我地9位既份量俾晒我老公... 真的很大的秘密啊!

煮完炒飯後, 可能緊接第二輪既用餐時段, 所以佢地安排我地坐一張16人枱, 可以一邊飲野, 一邊傾偈, 又唔會覺得佢地趕客, 真係好貼心啊!

我叫左焦糖綠茶 (左), 侍應奉上時話飲呢款飲品有步驟的, 先用飲管飲綠茶原味, 再用杯飲面層既焦糖同泡泡, 最後就攪均一齊飲... 好講究呀~

老公就叫左西瓜汁, 講開西瓜, 每次我地請司機幫我地影相時, 司機都總會問"西瓜甜不甜?" 然後你就答"甜", 即好似英文"say cheese"一樣, 原來呢句說話係所有台灣人都係咁講架... 老公對呢句說話入晒腦, 而家每次見到西瓜都會用普通話講"西瓜甜不甜?"...



到甜品喇~ 呢日係老公既舊曆生日, 我都冇刻意為佢安排D咩, 見到最後上左呢個心太軟, 又灑左D古古力粉裝飾, 我就靈機一觸喺上面寫上生日快樂喇!

大家有冇數過我地究竟食左食多道菜呀? 答案係: 唔計飲品都有16道啊!!! 真係超誇張, 仲要每樣份量都唔少呢~

最最後仲有自家制梅酒... 超滿足既一餐啊!!!! 埋單只係2200台幣一位咋!

返到民宿, 有團友買左仙女棒, 我地就一齊玩寫字, 亂畫一通, 仲要每pair一齊畫個心... 我地畫2 takes就搞掂喇! 仲要畫得最工整果pair呢~