熱辣辣宜蘭夏令營 Day 3 ~ 龜山島賞海豚

2013年7月1日 (一) 晴

今日要走喇! 但節目依然豐富~ 早餐同噚日差唔多

 

多左呢個冷麵... 同埋好多團友都話呢隻"純萃。喝"既咖啡好飲, 於是我就買左支Latte試下, 我就覺得無乜特別啦!

執好行李要離開民宿喇! 跟住我地會去烏港碼頭出海賞鯨... 搭呢程車時就真係緊張囉... 話說司機話由民宿去碼頭只需大約半個鐘, 但我地個司機揸車實在太穩陣(即係好慢), 沿途兩架車既司機又不停傾偈, 雖然可能話職業司機就算傾偈都可以照揸車, 但船唔等人, 我地就真係心急如焚... 好彩最後俾我地最後一刻趕到啫! (賞鯨團係由司機幫我地代辦既, 唔知係咪因為佢同個團熟, 所以定過抬油呢?)

我地就係搭呢架船出海喇... 船上仲有其他乘客...只爭我地..

風和日麗真係好啱出海呢~

架船開左無幾耐, 船長就叫我地留意附近會有海豚出現... 嘩! 真係有海豚, 一群大約有三, 四條... (呢D相係同事部機影, 影得好清楚啊!)



呢度有三條呀!



D水花好似旋轉咁~



睇海豚最佳時候係七, 八月, 好彩的話亦有機會見到鯨魚架!  當然有人亦試過連一條海豚都睇唔到...所以都係講彩數呢~



離開海豚, 我地就前往龜山島環島遊一圈, 不過我地就冇揀上島, 呢個島既外形又真係好似隻龜喎!

沿途船長亦會介紹個島既形成, 呢張相淺藍色海水既部份唔係一個沙灘, 而係溫泉水出口, 所以令到海水變成淺藍色...好有層次, 好靚呀!

天氣真係非常好, 不過好大風, 有D團友都頂唔住而暈船浪...

而我...其實大半程船程都好enjoy既, 仲週圍行黎行去影相... 點知呢個時候, 發現我個鏡頭印左好大個手指模, 於是我就坐低抺鏡頭... 點知一低頭集中精神我就出事喇...
我突然覺得好想嘔 (但我係冇暈既感覺), 咁啱我旁邊有個同事亦係暈船浪, 個個都攞定膠袋俾佢stand by, 而我就即刻問人攞定個膠袋, 自己走去船尾, 一坐低就嘔左出黎... 嘔完就舒服好多, 我覺得自己暈船浪都算暈得舒服囉... 嘔唔出仲辛苦呢~ 好彩係回程時先暈, 好快就已經埋岸喇... 之後一上車就訓, 訓醒就冇事喇!