熱辣辣宜蘭夏令營 Day 2 ~ 森林探秘

2013年6月30日 (日) 晴

今日8點就要集合, 所以6點幾就起左身, 順便喺民宿週圍行下... 雖然6點幾仲好早, 但個天已經完全光晒... 好似8, 9點咁...天氣非常好!



民宿正門


民宿後面, 右手邊第一間就係我地間房喇...

 

 

民宿既左右兩邊都種滿稻田, 呢幅剛剛收割左

串串金黃色既稻米呀!

7點就開始食早餐喇, 呢度係自助餐形式, 食既都係以台式清淡為主... 我稱之為"養生早餐", 因為每樣都係少鹽少油的, 而且有D配料例如香草都係民宿主人自己種, 自給自足

右下角既係南瓜綠豆粥, 冇鹽的, 其實我覺得OK, 但好多人都食唔慣呢~



大家食完早餐就準時出發喇~ 今日係去"太平山森林遊樂區", 係要行山既, 所以途經便利店就買定水同糧食... 不過未去到已經俾我地食左個飯糰喇... 7仔既飯糰好好味, 塊紫菜同飯係分開包, 所以紫菜仲係好脆架...  真係好鍾意呢度既7仔, 又大又有枱櫈, 又多野賣...

大約兩個鐘車程就黎到太平山遊客中心, 喺呢度攞張地圖, 決定行邊條路線, 去個方便就可以出發喇!

話晒一行16人, 大家行兩行又要停低影下相, 行兩步退後一步既作風... 所以揀左條最短最容易既路線行, 就係呢條"見晴懷古步道"作為到此一遊

呢度接近海拔2000公尺, 所以山上氣溫比山下低10度, 大約25度左右, 加上山上大霧, 空氣清新, 非常舒服

呢條步道係昔日運送物資既軌道, 而家已經荒廢左, 但仍然保留呢D特色路軌

有D已經斷開兩截... 好有哈利波特feel呀!



好多本地人見到有水源就毫不猶豫咁飲水洗面... 司機先生都大叫好清涼, 叫我地試試...不過我就唔駛客氣了!

現場真係仙景一樣

除左路軌, 仲有幾條吊橋


來回都只係用左1個鐘左右, 跟住我地就去太平山山莊食lunch喇!

直徑有成個人咁高啊!

夏天都有紅葉~

我地既午餐就係山上食既鄉土菜, 味道都唔錯架!


食完lunch, 時間尚早, 原定既行程係去幾米公園既, 但司機先生話唔順路, 建議去附近既溫泉區煮溫泉蛋, 幾米公園就留返聽日先去!

原來所謂既溫泉就係中間呢個火山型既池... 好大陣.... 味...

一場黎到, 一於試下烚溫泉蛋啦! 睇完指示, 先去低溫區烚3-4分鐘, 再去熱水區烚4-6分鐘, 烚完去沖個凍水涼就得架喇... 

可惜有幾隻蛋爆左... 其實同普通半熟蛋係冇分別既...hehe... (有溫泉味你先驚!)

之後司機先生又帶我地去左"下一站幸福"既拍攝場地, 雖然我冇睇過呢度劇, 但淨係聽套劇名已經覺得好幸福喇...哈哈!

呢間屋好有日本風呢~

 

 喺呢度大家又影下D無聊相, hea下, 玩下獎門人遊戲....

 

不過大家似乎都頂唔順炎熱既天氣... 好想搵D冰凍野食下... 於是下一站要去食冰呀!!